Voltiza Duro – Ka përfunduar raporti final i akreditimit të institucioneve të arsimit të lartë në vend, ku Kolegji Universitar Luarasi ka marrë një vlerësim ekselent.
Agjencia britanike mori në shqyrtim plot 35 universitete e në bazë të intervistave apo dokumentacionit, vetëm 4 prej tyre, përshirë këtu edhe “Luarasin”, arritën të marrin pikët maksimale duke u akredituar për 6 vite.
Kjo agjenci arriti në konkluzionin se “Luarasi” i përmbush maksimalisht të gjitha standardet shtetërore të cilësisë në të 5 fushat e akreditimit.
E pranishme në prezantimin e raportit final, ishte dhe ministrja e Arsimit, Sportit e Rinisë, Lindita Nikolla e cila theksoi se procesi i akreditimit ka qenë tërësisht i ndarë nga politika.
“Nuk ka asnjë përfaqësuese të kabinetit të ministres së Arsimit, dhe për këtë unë jam absolutisht mirënjohëse dhe e vendosur për të ecur përpara, si një parakusht për të thënë edhe në mënyrë qartë, që është një bord akreditimi tërësisht i ndarë nga politika”,-u shpreh Nikolla.
Kjo e fundit bëri me dije se do të vijojnë më tej me inspektimet për verifikimin e kritereve ligjore në mënyrë që cilësia e diplomave të jetë e krahasueshme me ato të vendeve më të mira.
“Jemi në momentin e duhur pas këtij verifikimi serioz, për të vijuar më pas me akreditimin e programeve, por ne do të vijojmë me detyrën tonë për të proceduar me inspektimin e radhës për verifikimin e kritereve ligjore. Prioriteti ynë në shëndoshjen e institucioneve, cilësi të diplomave të krahasueshme me ato të vendeve më të mira, por patjetër për t’i lidhur në mënyrë integrale me vendet e punës”,-shtoi ministrja e Arsimit.
Ndërkaq, të gjithë ata universitete që plotësonin pjesërisht kriteret kanë marrë rekomandimet nga agjencia e sigurimit të cilësisë në arsimin e lartë për përmirësimin e kushteve. Më tej, kreu i bordit të akreditimit, Arjan Gjonça, listoi disa nga faktorët ndikues që i renditën universitetet private më mirë se ata publikë.
“Nuk është e rastësishme që një grup institucionesh private me 5-6 vite akreditim, kanë dalë në vendin më të mirë. Mos harrojmë që këto institucione kanë pasur një eksperiencë akreditimi dhe vlerësimi, sepse ligji i ka detyruar ato, ndërkohë që ligji duhet të detyronte dhe institucionet publike, por nuk është zbatuar”,-theksoi në fjalën e tij Gjonça. Ndërkohë, anëtarët e bordit të akreditimit nënvizuan se 1/3 e shpenzimeve të procesit mbulohet nga buxheti i shtetit, ndërsa pjesa tjetër nga vetë universitetet. I gjithë procesi deri në hartimin e raportit final, mori nën vëzhgim plot 53 universitete, ku 22 prej tyre ishin private dhe 13 të tjerë publikë.
